Днесь светло торжествует Крымская земля, / прославляюще своего великого молитвенника. / Просиял бо еси днесь яко светильник огнезрачный, / и ревностный поборник веры православныя. / Гурие преславне, // молитвенниче о душах наших
Житие твое светлостию добродетелей украшено, / облистает Крымскую землю. / Рака же мощей твоих, / всем с верою к ней приходящим, / лучи чудес источает, / и ниспосылает многи чудеса просящим. / Гурие преславне, // заступниче душ наших.
Радуйся роде всечестный / служителей Церкве Божия, / умудривый свое чадо, / и просветивый е словом истины. / Радуйся Отечество наше, земле Русская, новый вертограде Господень, израстивый нам Гурия преславного, // правыя веры насадителя.
Измлада научен словесем спасительным, / смирением, терпением и многими добродетельми украшен. / Любови к ближним источниче, / Гурие всечестне, // лика святительскаго удобрение.
Подобник был еси, / духовнаго учителя твоего, богоблаженнаго Иннокентия, / ревностного архипастыря Церкви Божия, / Евангелия премудраго благовестника / и мнозих языков наставника, / Гурие преславне, // ходатаю спасения душ наших.
С кротостию и смирением, наипаче же с любовию уча отроки иным языкам / граду Саратову явился еси смиренный служитель и отроком во благочестии наставник, / Гурие священнейший, // Бога непрестанно моли о воспевающих тя.

Приидите православных множество, / похвальныя песни принесем угоднику Божию, / предивному Гурию, / се бо яко финикс прозябший в дому Божии, / процвел яко крин сельный в Китайстей стране, / созидая Церковь Божию и утверждая люди в вере православней, // образом жития твоего, Гурие блаженне.

Память праведнаго с похвалами, и благословение Господне на главе его. / Блажен человек, иже обрете Премудрость, и смертен, иже уведе разум. / Лучше бо Сию куповати, нежели злата и сребра сокровища. / Честнейшая же есть камений многоценных, все же честное недостойно Ея есть. / Долгота бо дней и лета живота в деснице Ея, в шуйце же Ея богатство и слава. / От уст Ея исходит правда, закон же и милость на языце носит. / Послушайте убо Мене, о чада, честная бо реку: и блажен человек, иже пути Моя сохранит; / исходи бо Мои, исходи живота, и уготовляется хотение от Господа. / Сего ради молю вас и предлагаю Мой глас сыновом человеческим: / яко Аз премудрость устроих, совет и разум, и смысл Аз призвах. / Мой совет и утверждение, Мой разум, Моя же крепость. / Аз Мене любящия люблю, ищущии же Мене обрящут благодать. / Разумейте убо, незлобивии, коварство, ненаказании же, прилагайте сердца. / Послушайте Мене и паки, честная бо реку: и отверзу от устен правая, / яко истине поучится гортань Мой, мерзки же предо Мною устны лживыя. / С правдою вси глаголы уст Моих: ничтоже в них стропотно, ниже развращенно. / Вся права суть разумевающим и проста обретающим разум. / Научаю бо вас истине, да будет о Господе надежда ваша и исполнитеся Духа.

Уста праведнаго каплют премудрость, язык же неправеднаго погибнет. / Устне мужей праведных каплют благодати, уста же нечестивых развращаются. / Мерила льстивая мерзость пред Господем, вес же праведный приятен Ему. / Идеже аще внидет досаждение, тамо и безчестие: уста же смиренных поучаются премудрости. / Совершение правых наставит их, и поползновение отрицающихся упасет их. / Не пользуют имения в день ярости, правда же избавит от смерти. / Умер праведный, остави раскаяние, наручна же бывает и посмеятельна нечестивых пагуба. / Правда непорочнаго исправляет пути, в нечестие же падает неправда. / Правда мужей правых избавит их: безсоветием же пленяются беззаконнии. / Скончавшуся мужу праведну, не погибнет надежда, похвала же нечестивых погибнет. / Праведник от лова убегнет, вместо же его предается нечестивый. / Во устех нечестивых сеть гражданом, чувство же праведных благоспешное. / Во благих праведных исправится град, и в погибели нечестивых радование. / Во благословении правых возвысится град, усты же нечестивых раскопается. / Ругается гражданом лишенный разума, муж же мудрый безмолвие водит.

Праведник, аще постигнет скончатися, в покои будет. / Старость бо честна не многолетна, ниже в числе лет исчитается. / Седина же есть мудрость человеком, и возраст старости житие нескверное. / Благоугоден Богови быв, возлюблен бысть, и живый посреде грешник преставлен бысть. / Восхищен бысть, да не злоба изменит разума его, или лесть прельстит душу его. / Рачение бо злобы помрачает добрая, и парение похоти пременяет ум незлобив. / Скончався вмале, исполни лета долга. Угодна бо бе Господеви душа его, сего ради потщася от среды лукавствия. / Людие же видевше и не разумевше, ниже положше в помышлении таковое. / Яко благодать и милость в преподобных Его, и посещение во избранных Его.

Днесь созываются людие Божиии / и ликовствует Таврическая страна, / наста бо память преславного угодника Христова, / лютыя страдания претерпевшаго, / Господевиви данный обет соблюдшаго, / иноческий чин приимшаго, / и душу свою во всемощныя руце Его предавшаго. // Ныне бо молится о чтущих святую память его.
Научаясь во граде святаго Петра, / образом добрым братии в трудех и молитвах явился еси, / сего ради Церковь во пресвитера тя постави, / и проповедати в дальнюю восточную страну посла / ты же тамо много трудился еси, насаждая вертоград Божий. // Моли спастися всем нам.

Приидите, верных собори, / приидите, составим лик, / торжествующе и Бога прославляюще, / в радостный праздник святителя Гурия, / сей бо вшел в радость Господню, / равный апостолам от народа наречен бысть, / велии бо труды подъял еси на востоце, / и ныне с мученики китайскими, / молит Триединаго Бога, // о земнем Отечестве нашем.

Тебе, о Богомати, вси ныне слезно взываем: / вонми предстательству святителя Гурия о нас, / и Сыну Твоему молитвы вознеси, / о спасении душ наших.

Земле Крымская, / святый граде Симферополе, / украшай твой дом, / в немже Божественный / святитель Гурий прославлен бысть.
Стих: Уста моя возглаголют премудрость, / и поучение сердца моего разум.
Церковь наша, / красуйся и ликуй, / се бо чадо твое / Гурий священнейший, Престолу Владычню // во славе предстоит, радующеся.
Стих: Уста праведнаго поучатся премудрости, / и язык его возглаголет суд.
Святии вси земли Крымския, / узрите новаго собрата вашего, / той бо понесе труды мнози, // в земнем Отечестве вашем.

Град Симферополь преславный, / ныне ликовствует и благочестием твоим хвалится. / Днесь церковь святых апостолов Петра и Павла, / сохраняюще многоцелебныя мощи твоя, / яко пребогатое сокровище, / благодать Божию приемлет. / Днесь людие земли Крымския, / и всея Церкви стекаются на поклонение, // прославляя честную твою память Гурие доброхвальне.

Духом Божиим водимь, святителю отче Гурие, / страну Китайскую светом Евангелия просветивый, / ересей и расколов в земле Тавричестей добрый победителю. / Слова Христова в ней усердный насадителю, / тем же и о чтуще многоцелебныя мощи твоя, / моли Христа Бога / разум истины нам даровати / и душам нашим велию милость.

Земли китайския просветителю / и Слова Божия в ней усердный насадителю, / Церкви Российския похвало и земли нашея утверждение, / мучеников наставниче и о людех твоих к Богу теплый молитвенниче, / святителю отче Гурие, моли Христа Бога / мир Отечеству нашему даровати // и душам нашим велию милость.

От юности святителю Бога возлюбил еси Гурие блаженне, во бдениих и пощениих, и иных трудех много подвизался еси, темже и явился еси жилище Духа Святаго, Егоже действием светло ныне украшен, моли спасти нас воспевающих тя.

Из глубины зол вопием ти: виждь, Владычице, скорбь нашу, и не отвержи нас во обстоянии сущих. Услыши вопль наш, и покрый ны ризою Твоею, славно бо прославися.

Святое послушание восприим, и святительства одеждою облечен, Гурие угодниче Христов, учитель добр народу Божию бывает, словом, верою и делы, люди благочестию научая и путь еже ко спасению показуя.

Едина крепкая и теплая Предстательнице роду человеческому, Богородице Дево, непрестанно молися со святителем Гурием, и святыми мученицы иже в царствующем граде Пекине, от безбожных пострадавшими, мнози муки претерпевшими, согрешений оставление даровати, всем поклоняющимся верою Богомужному Рождеству Твоему.

Величаем тя, / святителю отче наш Гурие, / и чтим святую память твою, / ты бо молиши о нас / Христа Бога нашего.

Во вся концы страны Китайския, и земли Таврическия протекоша глаголы твоя равноапостольныя, святителю отче Гурие, научил бо еси Троицу Триипостасную богословити во Едином Божестве.

Утреннююще, Всепетая взирая на Образ иконы Твоея со святителем вопием ти: спаси ны, ты бо еси едина Заступнице наша усердная, разве Тебе иныя не вемы.

Прокимен, глас 4: Уста моя возглаголют премудрость, / и поучение сердца моего разум.
Стих: Услышите сия, вси языцы, внушите, вси живущий по вселенней. Всякое дыхание:

Непрестанною молитвою, / учительными словесы твоими, / велиим милосердием и добродетельным житием, / образ верным был еси, богомудре Гурие, / всех ко Христу приводя, / и на путь спасения наставляя: / твоего отеческаго заступления не лиши и нас, / великий святителю Божий, // почитающих святую память твою.

Ирмос: Яко по суху, пешешествовав Израиль / по бездне стопами, / гонителя фараона / видя потопляема, // Богу победную песнь поим, вопияше.
Припев: Святителю отче наш Гурие, моли Бога о нас!
От юности твоея Христу последуя Церкве Божия прилепился еси / ум свой горе возвысивши / поприще земнаго жития твоего невозбранно прешел, / щедрою десницею твоею милостыню просящим подавал еси, / Гурие всемилостиве, / тщету земнаго стажания проповедая / земная на небесная пременил еси богомудре.
Купца премудраго себе соделав, ты, святителю, Бисер Многоценен — Христа обрел еси / сего ради вся земная оставльши иноческим ликом сопричелся еси
Благодать священства восприим, утешение велие и духовное укрепление обрел еси в служении Святых Христовых Тайн, Тех и нас сподоби присно причащатися, к Богу молитвами твоими.
Богородичен: Спаси нас от всяких бед, Всемилостивая Владычице Богородице, и Твоими молитвами к Сыну Твоему и Богу нашему, исцели от греховныя болезни страждущия души наша.

Ирмос: Несть свят, / якоже Ты, Господи Боже мой, / вознесый рог верных Твоих, Блаже, / и утвердивый нас на камени // исповедания Твоего.
Молитвенные подвиги и труды твоя, яже в земли Китайстей, яко труба богогласная вопиют к Богу, проповедуя житие твое ангелоподобное
Божественное Евангелие и писания отеческая проповедал еси языкам царства Китайскаго, сего ради царствующий град Пекин и вся страна восточная Благовестником своим нарекоша тя.
Троицу Святую, Отца и Сына, и Святаго Утешителя Духа, исповедати православно роди языческие научил еси, / тем же и люди непросвещенныя ко Христу привел еси, пастырю предивный, / в молитве непрестанно пребывая
Богородичен: Множества грехов люте обдержат души наша, Ты же, Пречистая Богомати, молитвами Твоими ко Иже от Тебе Рождшемуся пленения сего греховнаго избави и на стезю спасения настави нас.

Кротости и смирения богомудрый наставниче, милосердия и нестяжания дивный поборниче, явивый свет Христова учения верным людем твоим, не остави нас, святителю отче Гурие, любовию чтущих святую память твою!

Образ пастырей истинный явился еси святителю, многи благочестивыя мужи во священство поставляя, Евангельскому житию всех научая, храмы мнози, обители и духовныя школы созидая, град Симферополь духовно преукрасил еси и молитвами твоими освятил еси. И ныне предстоя Престолу Вседержителя, молися о пастырех и людех, молящихся ти.

Образы святыми твоего Божественного лика преукрашена земля Таврическая, Матерь Божия, Сего ради помощию всех нас обогати Пречистая, и да вси народи земли нашея Дево Владычице, ублажающе, Тя возвеличают.

Ирмос: Христос моя сила, / Бог и Господь, / честная Церковь / боголепно поет, взывающи, // от смысла чиста о Господе празднующи.
Добрым делателем явился еси винограда Христова, Гурие доброхвальне, егда Церковь Божия, посреде языческия тьмы насажденная, доблий плод — святыя мученицы Ему принесе.
Мучеником дивный наставник и учитель богомудрый показал ся еси, егда духовная чада твоя, купно со священномучеником Митрофаном, за Имя Христово от братий своих смерть прияли есте и кровьми своими диавола посрамили есте
Багряницею кровей и венцы мученическими хвалятся ныне чада твоя, зряще Лице Святыя Троицы, Святителю Гурие, моли купно с ними, спасти души наша.
Богородичен: Госпоже Всепетая Богородительнице, моя помышления Твоими молитвами очистивши, покажи мя благоплодна, Мати всех Бога.

Ирмос: Божиим светом Твоим, Блаже, / утренюющих Ти души любовию озари, молюся, / Тя ведети, Слове Божий, / Истиннаго Бога, // от мрака греховнаго взывающа.
По послушанию оставив страны восточныя, богомудре, игуменом обители Симоновстей соделался еси, послежде и Ветсем Риме еретические мудрования обличил еси о Правей вере латином свидетельствуя, отче всеблаженне.
Льву от колена Иудина уподобился еси, святителю, и тезоименит быв Казанскому просветителю, житию его подражав, ревнитель отеческаго Святаго Правоверия явился еси, научи и нас ревновати о спасении душ наших
Промыслом Божиим, рук святительских возложением, изволением Духа Святаго во епископа поставлен бых, богоспасаемому граду Чебоксары истинный учитель благочестия и отец чадолюбивый явился еси, Гурие ангелонравне.
Богородичен: Ангельский собор и человеческий род о Тебе радуется, Благодатная Марие, Мати Неискусомужная, Невместимаго бо во чреве вместила еси и родила еси Спаса миру.

Ирмос: Житейское море / воздвизаемое зря напастей бурею, / к тихому пристанищу Твоему притек, вопию Ти: / возведи от тли живот мой, // Многомилостиве.
Предивный подобник и преемник духовнаго твоего учителя блаженнаго Иннокентия Иркутскаго быв на чувашстей земли, новому Златоусту — Таврическому Иннокентию последуя, возшел еси на святительский престол, от лет древних Первозванным Апостолом утвержденный, новую паству твою таврическую послушанию, братолюбию и милосердию присно научая.
Рыбаря и Верховнаго сущаго брата наследник, Климента священномученика и Мартина исповедника верный ученик, Гурие священнейший, на высоте апостольскаго престола седя в ризу смирения облеклся еси и паству твою добре упасл еси
Волка мысленнаго пламенем веры отгнал еси и от звероуловления стадо твое избавил еси, безбожие и ереси из предела Таврическаго изгнав, Гурие ангелонравне, и ныне огради нас от расколов и погибельных ересей, и от духов нечистых восстающих на ны.
Богородичен: Всякаго существа высшее, Слово Божие воплощенно нам родила еси: темже Богородицу Тя устнами и душею проповедуем.

Возбранный чудотворче и предивный угодниче Божий, / святителю отче наш Гурие, / Церкви Таврическия похвало и земли нашея радование, / молитвенное восписуем ти пение, / ты же яко имеяй велие дерзновение ко Владыце небесе и земли, / от всяких страстей, недугов душевных и телесных свободи / да вси во умилении зовем ти: / Радуйся, святителю отче наш Гурие, земли Крымския похвало и утешение!

Ангелов Творец и человеков Создатель избра тя от утробы матерния и от корене благочестиваго, предвидя непоколебимую веру твою и апостольския труды твоя, во славу Всесвятаго Имене Своего, освяти и на степени святительства постави, мы же обретше тя новаго светильника и чудотворца со благоговением и любовию поем ти:
Радуйся, родителей твоих благочестивых богомудрый сыне.
Радуйся, правоверия предков наследниче.
Радуйся, кротости и благочестия родительскаго преемниче.
Радуйся, розго райская на земли прозябшая.
Радуйся, маслино плодовитая, елеем милости струпы греховная очищающая.
Радуйся, бане духовная, скверны страстей омывающая.
Радуйся, призывающим тя в помощь помогаяй.
Радуйся, по молитве волю Божию открываяй.
Радуйся, яко неисцельные болезни по твоим молитвам врачуются.
Радуйся, яко и враски и язвы закрываются.
Радуйся, нечистых духов от верных отгнание.
Радуйся, слепых прозрение и глухих слышание.
Радуйся, святителю отче наш Гурие, земли Крымския похвало и утешение!

Ирмос: Росодательну убо пещь / содела Ангел / преподобным отроком, / халдеи же опаляющее / веление Божие мучителя увеща вопити: // благословен еси, Боже отец наших.
Велегласного поборника святыя веры почитаем тя, святителю Гурие, еретики и хульники, а наипаче богомерзкое агарянское зловерие в Тавриде, посрамил еси, отпадшия от Церкви, к Истине паки возвратил еси, словом Правды оглашая
Илие ветхому подобяся, об истиннем боговедении народа поревновал еси, Святителю Гурие, Писанию Божественному неустанно уча, премудрости книжней в духовных школах пастыри и отроки наставляя
Праведному Иосифу Обручнику подражая о чистых девах и вдовицах сугубое попечение имев, училище благочестия и церковь Божию им устроил еси, храмом Сретения Господня град Симферополь украшая.
Богородичен: Превечно от Отца возсиявша Бога Слова во утробе плотию заченшую вси ублажаем, яко Матерь всех Бога.

Ирмос: Из пламене преподобным росу источил еси / и праведнаго жертву водою попалил еси, / вся бо твориши, Христе, токмо еже хотети, // Тя превозносим во вся веки.
От суеты мира сего отложився, посреде мира пребывая, мир, плоть и диавола посрамив, миру распялся еси, в любвеобильном сердце своем непрестанно взывая: Господа пойте дела и превозносите во вся веки.
Имя Сладчайшаго Иисуса на устех и в сердце своем деннонощно имея, образом и подобием Божиим воистину соделался еси, святителю Гурие, научая нас за вся благодарити и непрестанно пети Ему: Господа пойте дела и превозносите во вся веки
Поношение с кротостию претерпевая, побиение от нечестиваго псаломщика со смирением приял отче треблаженнейший, тако и нас научи со смирением претерпевати вся находящия на ны, по грехом нашим и во умилении воспевати: Господа пойте дела и превозносите во вся веки.
Богородичен: Всесвятая Дево, Бога Слова рождшая плотию, душ наших мрак Твоими молитвами отгнавши, просвети взывающих: Господа пойте дела и превозносите во вся веки

Ирмос: Бога / человеком невозможно видети, / на Негоже не смеют чини ангельстии взирати; / Тобою же, Всечистая, явися человеком / Слово Воплощенно, / Егоже величающе, / с Небесными вои // Тя ублажаем.
Духом с Богом на Небесех, телом же на земли с нами неоступно пребывая, моли со апостолы и пророки Троицу Святую — Бога нашего, Ей же во время земнаго странствия твоего всего себе предал еси, болезни наша исцелити и мир Отечеству нашему даровати, Святителю Гурие, молимся ти
Приносящия ти хваления сия и взывающия ко твоему святительскому заступлению не отрини нас от лица твоего и испроси прощение прегрешений наших, ко твоему благоутробию припадающия, Святителю Гурие, тебе усердно просим
Иже молитвами твоими исцеление от недугов обретшии и спасение от погибели улучивши, благодарственныя принесем Творцу нашему и хвалебные песни, прославляюще великаго христианом заступника Гурия всеславнаго
Богородичен: Смоковницу безплодну уплодоносившая и безматерних сирот Мати Милосердая бывшая, со святителем Таврическим Гурием, Сына Твоего умоли, помиловати души наша.

Кровию твоею честною от десницы твоея истекшею, во дни гонения лютаго на христианы, неверныя посрамил еси, гонители и хульники ко Христу привел еси, верныя же во Православии укрепил еси, Гурие пречудне и ныне, знаменьми чудес твоих, подаеши нам твердое упование на спасение в День Судный.

Велие и преславное Рождества Твоего таинство, Богорадованная Отроковице и Богомати Дево, пророцы проповедаша, апостоли научиша, мученицы исповедаша, ангели же воспевают, и человецы покланяются.

О, преславнаго чудесе! / Днесь земля Таврическая из недр своих мощи твоя нетленныя на прославление верным отдает / и мнози с верою исцеления чают, / се бо новоявленный Таврический святитель Гурий / вся прошения верных во благо исполняет. / Ангели же и человецы ликовствуют, / и демони с воплем прогоними бывают, / мы же взирая на образ твой божественный // хвалебныя песни тебе приносим.
О, преславнаго чудесе! / Светосияннный и божественный день наста, / в оньже мощи святителя Господня лобызающе, / и очистим себе от всякия скверны плоти и духа, / к бане духовной прибегающе / оставление грехов приемлем, / и воспоминая равноапостольныя подвиги его / сердца наша умащающе вонями исправлений его / в покаянии Христу зовуще: // угодника Твоего молитвами помилуй нас.
О, преславнаго чудесе! / Ныне мнози чудеса являеши нам святителю Гурие, / ибо и персть от гроба твоего источает исцеления, / одежды же твоя бывают нам во источник чудес / вернии же лобызающе чудоточныя мощи твоя, / воспевают пастыреначальника Христа // прославльшаго святыя Своя.
О, преславнаго чудесе! / Како неисцельныя болезни, Гурие богоблаженне, твоими молитвами врачуются, / и врачеве удивляются, разве может сие быти. / Мы же зряще таковаго угодника Божия, / на рамена своя крест по заповеди возложшаго / и во след Господа Распятаго грядущаго / вопием подвигоположнику Христу : // помилуй нас молитвами избраннаго Твоего.

О, преславнаго чудесе! / О Божественнаго к нам грешным долготерпения! / Яко умножившимся соблазном на земли и вере зело умаленей, / умножаются чудеса святителя Гурия. Зрите убо, верныя Церкве Христовы чада, / колико может молитва праведника, / како древних чудес подобие днесь нам является. / Слава Тебе, Христе Боже, / яко Ты еси чудодействуяй во святых Твоих: / сотвори ны достойны толикия благодати быти, // и радость спасения Твоего подаждь нам.

Владычице, приими молитвы раб Твоих, и избави нас от всякия нужды и печали.

Прокимен, глас 7: Уста моя возглаголют премудрость, и поучение сердца моего разум.
Стих: Услышите сия вси языци, внушите живущии по вселенней.
Апостол ко Евреем, зачало 335.
Аллилуиа, глас 2: Священницы Твои облекутся в правду, и преподобнии Твои возрадуются.
Стих: Внидем в селения Его, поклонимся на место, идеже стоясте нозе Его.
Евангелие от Матфеа, зачало 11.
Причастен: Радуйтеся праведнии о Господе, правым подобает похвала.