zhPAG5d7Ayg

Кондак 1
Возбранный чудотворче и предивный угодниче Божий,/ святителю отче наш Гурие,/ Церкви Таврическия похвало и земли нашея радование,/ молитвенное восписуем ти пение,/ ты же яко имеяй велие дерзновение ко Владыце небесе и земли,/ от всяких страстей, недугов душевных и телесных свободи/ да вси во умилении зовем ти:/
Радуйся, святителю отче наш Гурие, земли крымския похвало и утешение!

Икос 1
Ангелов Творец и человеков Создатель избра тя от утробы матерния и от корене благочестиваго, предвидя непоколебимую веру твою и апостольския труды твоя, во славу Всесвятаго Имене Своего, освяти и на степени святительства постави, мы же обретше тя новаго светильника и чудотворца со благоговением любовию покланяяся Ему с радостию поем ти:
Радуйся, родителей твоих благочестивых богомудрый сыне.
Радуйся, правоверия предков наследниче.
Радуйся, кротости и благочестия родительскаго преемниче.
Радуйся, розго райская на земли прозябшая.
Радуйся, маслино плодовитая, елеем милости струпы греховная очищающая.
Радуйся, бане духовная, скверны страстей омывающая.
Радуйся, призывающим тя в помощь помогаяй.
Радуйся, по молитве волю Божию открываяй.
Радуйся, яко неисцельные болезни по твоим молитвам врачуются.
Радуйся, яко и враски и язвы закрываются.
Радуйся, нечистых духов от верных отгнание.
Радуйся, слепых прозрение и глухих слышание.
Радуйся, святителю отче наш Гурие, земли крымския похвало и утешение!

 

Кондак 2
Видящее сродницы твои кротость нелицемерную, веру и добродетели твоя, познаша Бога, действующаго во святых Своих, предаша тя в руце благоговейных наставников, да станеши служителем олтаря Господня, попечение же о тебе возложше на Бога, Ему же воспеша: Аллилуиа.

Икос 2
В послушании у родителей пребывый, аки Василий Великий, Григорий Богослов и Златоустый Иоанн духовные науки возлюбивый, ты, святителю, в богословских школах много учился еси, яко велиими духовными даровании от Господа украшенный, сего ради аки раб верный таланты преумножил еси и велию награду от Домовладыки Христа стяжал еси. Мы подобящеся мудрым девам глаголем ти:
Радуйся, во юности твоей разум мужа мудраго показавый.
Радуйся, от юных лет твоих иго Христово понесый.
Радуйся, до последних твоих во бдениих и пощениих пребывавый.
Радуйся, яко подвигом добрым подвизался еси.
Радуйся, яко дивную любовь к ближним явивый.
Радуйся, себе чистым от всего сквернаго и нечистаго соделал еси.
Радуйся, вторый Иосифе, чистоту и целомудрие возлюбивый.
Радуйся, вторый Давиде, мысленнаго Голиафа пращею молитвы и поста сокрушивый.
Радуйся, якоже един от древних гордыню низложил еси.
Радуйся, и страсти своя, якоже студных пророков вааловых, умертвил еси.
Радуйся, истинных пророков Божиих единоревнителю.
Радуйся, Слова Божия неустанный благовестителю.
Радуйся, святителю отче наш Гурие, земли крымския похвало и утешение!

 

Кондак 3
Уразумел еси, отче богомудре, еще во отрочестве сый, яко вся преходящая и временная в мире сем, а «Господь едино упование есть», возжелал еси Ему единому служити и работати, темже и иноческаго пострижения сподобился еси. Мы же, чтуще богомудрое житие твое, поем Богу: Аллилуиа.

Икос 3
Имел еси присно пред духовныма очима своима образ Святыя Троицы, ум свой Богу выну возносил еси и последняя твоя поминая, вкусити неизреченныя радости в молитве сподобился еси, мы же умиленным сердцем вопием ти:
Радуйся, подвижниче веры Богом прославленный.
Радуйся, на свещнице церковнем поставленный.
Радуйся, от просивших у тебе не отвращавыйся.
Радуйся, коемуждо потребное в нуждах подававый.
Радуйся, Господа Иисуса в молитвах и деяниих твоих прославивый.
Радуйся, словесы спасительными многия к Нему приведый.
Радуйся, блаженство кротких и милостивых унаследовавый.
Радуйся, яко в нищете духовней суща себе познавый.
Радуйся, на грехи своя с сокрушением взиравый.
Радуйся, грешнейшим себе всех человек помышлявый.
Радуйся, всеми сими себе предочистивый.
Радуйся, достойным Царствия Небеснаго себе показавый.
Радуйся, святителю отче наш Гурие, земли крымския похвало и утешение!

 

Кондак 4
Разум духовный во мнозех подвизех стяжал еси и имже Небесныя истины провидел еси, тем же ныне ведяще тя великаго помощника и заступника всем страстями и волнами житейскаго моря обуреваемым, вопием избравшему тя Богу: Аллилуиа.

Икос 4
Ведяще ревность твою о спасении ближних, кротость и велию премудрость твою, Церковь Русская во пресвитера тя постави и проповедати в дальнюю восточную страну посла, ты же, пречудный отче, с радостию исполнял послушание сие, Словом Божиим, аки хлебом неким, насыщал алчущия и жаждущия правды, проповедая благовременно и безвременно. Тем же и мы ныне познаша тя, яко втораго Павла, в песнех прославляем:
Радуйся, духовный путевождю, света фаворскаго возжадавый.
Радуйся, Свет Истинный людем во тьме идолослужения пребывавшим показавый.
Радуйся, светильниче благосветлый и доныне просвещаяй люди твоя.
Радуйся, тьму языческую светом Евангелия Христова просветивый.
Радуйся, ко Христу- истинному Солнцу Правды кратчайший путь всем нам показавый.
Радуйся, и храмы мнози в душах новых созидавый.
Радуйся, в земней жизни твоей возлюбивый Правду.
Радуйся, душу свою полагавый за Истину.
Радуйся, пример дивнаго терпения нам явивый.
Радуйся, велиим проповедником Иерусалима Небеснаго бывый.
Радуйся, равноапостолом от народа нареченный.
Радуйся, за великия подвиги твоя лику святых сопричтенный.
Радуйся, святителю отче наш Гурие, земли крымския похвало и утешение!

 

Кондак 5
«Скорбни в мире сем будете», -рече Господь. Тако бысть прискорбно и многотрудно апостольское служение твое, егда в стране китайстей всем для всех был еси, дабы спасти их, сего ради поем Небесному Учителю твоему: Аллилуиа.

Икос 5
Многи труды подъемля в странствиих твоих, душу свою Жениху Христу уневестил еси, очистив себе многими молитвами и посты к новому- святительскому служению Церковью призван и во епископа Богоспасаемого града Чебоксары сонмом святителей поставлен бых. Тем же ныне с любовию восхваляем тя похвалами сими:
Радуйся, во градех и весех проповедавый.
Радуйся, яко молитвами и трудами твоими многия храмы в дальней восточней стране устроивый.
Радуйся, яко в беседах с сильными мира сего о евангельских истинах безбоязненно вещавый.
Радуйся, яко и язычнику богдыхану о Христе свидетельствовавый.
Радуйся, во время междоусобиц и войн к миру призывавый.
Радуйся, о сем к Богу много моливыйся.
Радуйся, яко молитвенным предстательством твоим брань на востоце прекратися.
Радуйся, яко мир благоденственный тамо устроися.
Радуйся, за добродетели и молитвы твоя Имя Христово бысть тамо прославлено.
Радуйся, яко веры твоея не посрамил есть Господь.
Радуйся, за сие от Царя Небеснаго и царя земнаго наград удостоенный.
Радуйся, и в новая времена сия от верных зело прославляемый.
Радуйся, святителю отче наш Гурие, земли крымския похвало и утешение!

 

Кондак 6
«Бездна греховная обыде мя и несть ми постояния», — рече Давид, ты же со пророком, апостолы и мученики рекл еси: «Господь упование, прибежище мое и Бог мой». Мы же, зряще добродетельное житие и богопросвещенный разум твой, вопием Творцу всяческих: Аллилуиа.

Икос 6
Проповедника кротости, терпения и смирения показа пастве твоей пастыреначальник Христос, труды бо твоими земли новы в Китае стяжал еси, тебе великаго светильника земли крымския, егда тя на Таврическую кафедру постави и преемником древним святителем и Херсонесским священномучеником содела, тем же людие православнии ныне воспевают ти:
Радуйся, яко трудами твоими земли новы обрел еси.
Радуйся, яко в Китае ты Церковь Божию исправил еси.
Радуйся, апостолом единоревнителю.
Радуйся, языческаго нечестия скорый обличителю и искоренителю.
Радуйся, трием святителем в добродетелех уподобивыйся.
Радуйся, яко у Престола Божия молитися о народе Божием сподобивыйся.
Радуйся, Святыя Троицы тайнозрителю.
Радуйся, Евангельскаго Благовестия богомудрый учителю.
Радуйся, тайны Царствия Божия народу открывавый.
Радуйся, яко любити небесная паче земных наставлявый.
Радуйся, Православия известная похвало.
Радуйся, кротости образе и веры правило.
Радуйся, святителю отче наш Гурие, земли крымския похвало и утешение!

 

Кондак 7
Силы Вышняго укрепляше тя, блаженнее Гурие, егды ты о спасении души своея ревнуя, во внутреннюю клеть сердца своего заключился еси, ум свой в Небесная вперил еси, чувствия своя аки некою стеною- молитвою оградив, множайшим подвигом предался еси, сего ради Подвигоположнику Христу, купно с тобою поем: Аллилуиа.

Икос 7
Зрящее многую и скорую помощь твою в скорбех сущим, любовь нелицемерную к нищим, сиротам и вдовицам, истинное нелицеприятие и дивную кротость твою, паства крымская воспеша ти:
Радуйся, корыстолюбия обличителю.
Радуйся, нищих питателю, сирых и убогих попечителю.
Радуйся, сугубое попечение о них имевый во всех местех служения твоего.
Радуйся, к истинному милосердию и нелицеприятию призывавый.
Радуйся, кротостию и незлобием твоим многия удививый.
Радуйся, ангельским житием твоим и добродетельми твоими ангелов и человеков Творца прославивый.
Радуйся, сладость райскую еще на земли сущи вкусивый.
Радуйся, сопричастником Царствия Божия во временнем житии сем бывый.
Радуйся, яко тленная в нетленная, Богу содействующу, преложивый.
Радуйся, причастниче Жизни вечныя и наследниче обетованных благих.
Радуйся, мучеников наставниче.
Радуйся, лика святительскаго красото.
Радуйся, святителю отче наш Гурие, земли крымския похвало и утешение!

 

Кондак 8
Странническое житие прешел еси зде на земли, не имея покоя в апостольских трудех твоих, но вечнаго и непреходящего Новаго Небеснаго града Иерусалима присно взыскуя, труды к трудам прилагал еси, выну поя Богу: Аллилуиа.

Икос 8
Странное видение предста ти, угодниче Божий, егда узрел еси паству твою Таврическую, смущаему от раскольников и уничижаему от агарян злочестивых, ты, святче Божий, во вся оружия Правды Его обеклся еси и деннонощно, аки истинный апостолом преемник, благовествовал еси во всех пределех земли Таврическия, сего ради благодарными усты и благодарным сердцем глаголем ти:
Радуйся, раскола нещадный обличителю и искоренителю.
Радуйся, в любве к догматам святителей Афанасия, Николая и Спиридона пламенный соревнителю.
Радуйся, в словесех твоих Златоусту уподобивыйся.
Радуйся, утешение от Господа нашего Иисуса Христа прияти сподобивыйся.
Радуйся, сирот милосердный питателю и попечителю.
Радуйся, чистых дев и вдовиц праведный хранителю.
Радуйся, скорбящих и в унынии сущих нечаемое обрадование.
Радуйся, и наше Богом дарованное веселие.
Радуйся, любви к ближним неиссякаемый источниче
Радуйся, нетления причастниче.
Радуйся, веру и надежду просящим тя от Господа подаваяй.
Радуйся, дар исцелений от Него стяжавый.
Радуйся, святителю отче наш Гурие, земли крымския похвало и утешение!

 

Кондак 9
Духовный вертоград, насажденный тобою, во славу Владыки Христа, принесл еси Ему благоплодныя мученицы китайстии, крымская же земля принесе Богу, яко жертву красну, кизилташскаго игумена Парфения, от злочестивых агарян убиеннаго и в пламене огненнем якоже древни мученицы сожженнаго. Мы же познаша тя, яко великаго светильника, в нощи греховней сияющаго, и наставника мучеником, вопием Богу: Аллилуиа.

Икос 9
Мученицы Твои, Господи, во страданиих своих венцы нетленныя прияша от Тебе, Бога нашего, непрестанно молятся о нас. Мы же, лобызая раны их, благоговейно вопием Богопросвещенному их наставнику и духовному отцу:
Радуйся, кладезю неисчерпаемый воды духовныя.
Радуйся, возлюбивый Богослужение церковное.
Радуйся, от стран восточных даже до Ветхаго Рима об Истине свидетельствовавый.
Радуйся, яко чад твоих в любвеобильнем сердце твоем вместивый.
Радуйся, с преподобномучеником Парфением присно моливыйся.
Радуйся, от заката солнечнаго до восхода Богу предстоявый.
Радуйся, в молитвах за люди заблудшия слезы мнози проливавый.
Радуйся, от Господа многоразличныя духовныя дарования стяжавый.
Радуйся, о нас грешных дивный молитвенниче.
Радуйся, целителю и чудотворче.
Радуйся, яко всем сердцем твоим о пастве болезновал еси.
Радуйся, яко в духовнем назидании пастырей и клира время проводил еси.
Радуйся, святителю отче наш Гурие, земли крымския похвало и утешение!

 

Кондак 10
«Честна пред Господем смерть преподобных Его», — рече Давид. Тако бысть и блаженное успение твое, предивный чудотворче, егда ангели Божии прияша святую душу твою и во обители небесныя вознесоша, верни купно с ними воспеша Дивному во святых Своих Богу: Аллилуиа.

Икос 10
Присно Церковь Крымская возносит благодарение Святей Троице за таковаго угодника, егоже даровал еси нам Всемилостивый Господь в новыя времена сия и восхваляет тя, святителю Гурие, похвалами сими:
Радуйся, яко Слово Божие исполнивый и проповедавый.
Радуйся, греховныя и злыя деяния обличавый.
Радуйся, и враги своя по Заповеди Божией возлюбивый.
Радуйся, яко и ненавидящих тя любовию Христовою обративый.
Радуйся, яко заушившему тя псаломщику вся простивый.
Радуйся, многажды о том моливыйся.
Радуйся, яко иерею Арсению Святительство предуказавый.
Радуйся, яко панагию твою во образ Божия благословения тому вручивый.
Радуйся, об отшествии твоем от мира сего от Бога извещенный.
Радуйся, за сие Бога возблагодаривый и прославивый.
Радуйся, сего ради во обители Отца Небеснаго восшедый.
Радуйся, звездо Таврическая на небе церковнем присно сияющая.
Радуйся, святителю отче наш Гурие, земли крымския похвало и утешение!

 

Кондак 11
Во времена гонения лютаго на христианы Господь попусти безбожным взорвати святый храм, идеже по успении положено бысть святое тело твое. В тыя же дни явлено бысть и чудо нетления мощей твоих, яже благоговейнии жители града Симферополя, от поругания спасти хотящии, в ином месте до времени сокрыша и воспеша чудес истинному Источнику: Аллилуиа.

Икос 11
«Кость праведнаго не сокрушится»- словеса сии исполнишася на тебе, святителю, егда Божиим произволением посмертная слава твоя открыся и святыя мощи твоя, в нетлении почивающия, верными паки обретены были есте. Мы же купно со отцы и матери наша во умилении поем ти:
Радуйся, словес Господних истинное исполнение.
Радуйся, во времена безбожия верным укрепление.
Радуйся, в годину гонения лютаго и великия брани явлении твоими жителей града Симферополя утешавый.
Радуйся, яко град наш своим градом наименовавый.
Радуйся, в видении благочестивой инокине хранити град Симферополь обещавый.
Радуйся, обещании сии, Богу содействующу, исполнивый.
Радуйся, яко елеем из лампады у гроба твоего многи недужныя здравы соделавый.
Радуйся, землею с могилы твоея рабу Божию от грудныя болезни исцеливый.
Радуйся, духовнику святителя Луки- архимандриту Тихону явивыйся.
Радуйся, послежде с ним во единой гробнице положивыйся.
Радуйся, яко Богом на небесех пред ангелы и святыми прославленный.
Радуйся, и верными на земли непрестанно воспеваемый.
Радуйся, святителю отче наш Гурие, земли крымския похвало и утешение!

 

Кондак 12
Во времена новыя сия суди Господь третицею, святителю Гурие, погребену быти одесную великаго целителя и чудотворца, святителя и исповедника Луки, знаменуя сим равную с ним славу и грядущее твое в лике святых крымских скорое прославление. Тем же ныне паства крымская, зрящее дивное сие Господне о тебе промышление, вопиет Ему: Аллилуиа.

Икос 12
Светодательна светильника всем во мраце греховном сущим, зрим тя, стада словеснаго Христова добраго Архипастыря. Тако и ныне у Престола Божия ты предстоиши и непрестанно молиши Его о всех нас, с верою вопиющих и глаголющих ти:
Радуйся, духовно ослепшим скорое прозрение.
Радуйся, грехи и страстями сляченным быстрое свобождение.
Радуйся, врачу богомудрый, силою Божией душевныя и телесныя недуги врачующий.
Радуйся, силы и крепость расслабленным подавающий.
Радуйся, в унынии и греховней печали сущих на молитву паки подвизаяй.
Радуйся, всем в помощь тя призывающим помогаяй.
Радуйся, от Церкви и ея спасительнаго учения отступившим к Богу скорое возвращение.
Радуйся, раскольником и агаряном грозное обличение.
Радуйся, во тьме безбожия и глубине греховней сущим воззвание.
Радуйся, скорое тех исправление.
Радуйся, святоотеческаго подвига непрестанный хранителю.
Радуйся, обителей иночествующих созидателю и украсителю.
Радуйся, святителю отче наш Гурие, земли крымския похвало и утешение!

 

Кондак 13
О пресветлый и преславный угодниче Божий, святителю отче наш Гурие! Церкви крымския священная главо и земли нашея Богом данное украшение, малое сие моление милостивно приимши, помяни ны, восхваляющия равноапостольныя подвиги твоя. Умоли Человеколюбца Бога молитвами твоими от геены избавитися нам и богоприятным твоим ходатайством купно со всеми святыми воспевати Ему: Аллилуиа.
(Чти сей Кондак трижды и по сем Икос 1 и Кондак 1)

 

Молитва Святителю Гурию, архиепископу Таврическому

О великий и преславный святителю отче наш Гурие, града Симферополя похвало и земли крымския радование!
Во бдениих и пощениих неослабно пребывая, душу свою Небесному Жениху Христу уневестил еси и обителью Святыя Троицы, Ей же ныне со ангелы предстоиши, соделал еси.
Блаженному Иннокентию Иркутскому последуя, новыя люди ко Христу привел и Церковь Божию посреди языческия тьмы во стране хинов, яже на востоце утвердил еси.
После же во благославенней Тавриде сугубо потрудился еси: храмы и обители созидая, образ милосердия, кротости и любви всем благоразумным являя.
Воззри же на нас, чад твоих, святителю Божий, от Престола Всесвятыя и Достопокланяемыя Троицы, Ей же ты и ныне о пастве твоей дерзновенно молишися. Виждь немощь нашу и скорби, исцели сокрушенные души и тяжесть грехов облегчи, прими воздыхание наше, от любви сердечныя тебе приносимое.
Даруй нам, чадом твоим, яже во Отечествии и в разсеянии сущим и приносящим ти моление сие, добрым подвигом подвизатися на земли, веру непоколебиму православну в сердцах наших содержати до последнего дне, и на Страшнем Судилищи Христа Бога нашего стати одесную Праведнейшаго Мздовоздаятеля Судии, Егоже ты непрестанно моли о спасении душ наших! Аминь.

Тропарь,гл.3
Духом Божиим, святителю отче наш Гурие, страну китайскую светом Евангелия просветивый, ересей и расколов в земли Тавричестей добрый победителю, Слова Христова в ней усердный насадителю, тем же и о чтущих многоцелебныя мощи твоя, моли Христа Бога разум истины нам даровати и душам нашим велию милость.

 

Кондак,гл.8
Кротости и смирения богомудрый наставниче, милосердия и нестяжания дивный поборниче, явивый свет Христова учения верным людем твоим, не остави нас, святителю отче Гурие, любовию чтущих святую память твою!

 

Просмотры (51)

Добавить комментарий

Ваш e-mail не будет опубликован. Обязательные поля помечены *